Rivlerësimi i pronave Janar 2026, tatimi i shitjes do të jetë 5%
Nga 1 janar 2026 nis rivlerësimi i pronave, tatimi i shitjes do të jetë 5%
Të gjithë individët, të cilët kanë në pronësi pasuri të paluajtshme kanë të drejtë të bëjnë rivlerësimin e kësaj pasurie me vlerën e tregut nga data 1 janar deri në 30 shtator 2026.
Kjo është një mundësi për qytetarët dhe bizneset që të përditësojnë vlerën e pasurive të tyre në përputhje me çmimet aktuale të tregut me një normë tatimore më të ulet.
Për procesin e llogaritjes së vlerës së pronës, tatimi do të jetë 5%, nga 15% që paguhet sot, nëse shet pronën. Tatimi paguhet për diferencën e vlerës mes asaj të regjistruar në kadastër dhe asaj me të cilën shitet.
Konkretisht, nëse një person ka blerë një pronë 100 mijë euro dhe sot e shet 120 mijë euro, ai do të duhet të paguaj 15% tatimin për këtë diferencë prej 20 mijë eurosh qytetari i detyrohet shtetit 3 mijë euro, ndërsa me këtë ndryshim ligjor kur bëhet përafrimi i çmimit me vlerën e tregut tatimi zbret në 5%, dhe paguan 1000 euro.
Kush përfiton?
- Të gjithë individët që zotërojnë pasuri të paluajtshme (apartamente, shtëpi, truall etj.)
- Bizneset që kanë pasuri të paluajtshme të regjistruara me vlerë më të ulët se tregu
- Individët në proces legalizimi apo regjistrimi të pronës (do të ketë udhëzime të veçanta)
Procesi i fundit i rivlerësimit kishte tatim 3% në vitet 2020-2022, dhe nga i cili kaluan në proces 168.000 prona dhe buxheti i shtetit përfitoi 12.7 miliardë lekë.
Në të njëjtën kohë, ulja e tatimit për shitblerjet mund të nxisë më shumë lëvizje në tregun e pasurive të paluajtshme, sidomos në zonat me potencial të lartë zhvillimi.
